سيزيف مصري

في الأسطورة الأغريقية، سيزيف في الجحيم وعقابه أن يرفع صخرة من القاع حتي قمة جبل شاهق، وقبل أن يصل بقليل تسقط منه لأسفل، فيعود ليبدأ من جديد، بلا نهاية. ما أشبه ذلك بنا، أولادك يا بلدي

Sunday, September 10, 2006

عايز تفهمني إنها صدفة يا أيمن يا حامد؟



أيمن حامد مات

عايز تفهمني إنها صدفة يا أيمن يا حامد؟ تموت في نفس اليوم، 9 سبتمبر، يوم وفاة رياض السنباطي حبك الأول (1981)؟

ولا تكون المشكلة في شهر سبتمبر؟ أيلول الأسود، ومحرقة بني سويف 2005، وإنت دلوقتي. سبتمبر يا إليوت هو أقسي الشهور، مش إبريل.

"September" is the cruelest month, breeding
Lilacs out of the dead land, mixing
Memory and desire, stirring
Dull roots with spring rain
…………
And the dead tree gives no shelter, the cricket no relief
And the dry stone no sound of water. Only
There is shadow under this red rock,
Come in under the shadow of this red rock
(T.S.Eliot, Waste land)


أنا عارف. هأبقي أنا آخر واحد يمشي. هاستني يجيني خبرهم واحد ورا التاني، بالتليفون برضه. ببساطة عشان الموت
بيختار. زي ما اختارك. واللي ما عندهمش مشكلة كبيرة مع الموت وما تفرقشي معاهم الحياة كتير لازم يبقوا هما الآخر. اللعبة كده


"والله لو جابولي يوم حتي القمر
لاقولهم هاتولي عنه ولو خبر"

يعني إيه مت؟ يعني لو اتصلت بيك دلوقتي مش هترد عليا؟

أنت مسجل لي تمارين بصوتك، باسمعها واستغرب من الكلام ده...يعني إيه مت؟



أول ريسيتال ليك لوحدك كان في بيت العود ديسمبر 2004. حللت لك اختياراتك اليوم ده بالحساب: "حضرتك مختار 8 مقطوعات ولا فقرات في الحفلة دي. 2 لرياض السنباطي، و2 من تأليفك (علي اسم مصر وإرتجال)، ومقطوعة لنصير شمة وواحدة لعبده داغر ولونجا لالفريد جميل وموسيقي ميكس لعبد الوهاب. الاختيارات دي مش عبثية رغم إن إنت يمكن ما كنتش واعيلها وبتعد واحد اتنين، ده حتي الترتيب يا أخي في الحفلة له دلاله".

كانت حفلة تليق بفنان زيك. فنان يرتجل موسيقي لتدريب عشان تعلمني منه تكنيك فيطلع الإرتجال تيمة محتاجة شوية شغل وتبقي مقطوعة رائعة. بس ما كنتش بتهتم بإكمال الحاجات دي للآخر. حفلة ريسيتال عود بتاعة عواد قدمت فيها مروة ناجي تغني وتعزف إنت وراها لحن رياض اسنباطي.

يعني إيه مشيت؟

يابن ميتين الكلب

كنت إمبارح بأقول هاتصل بيك وأقولك إزاي تسيبني كل ده وما تحاولشي تطمّن عليا
.

أي حداد ينفع دلوقتي؟ حداد تلميذ فاشل لأستاذ مشي من غير ما يفكر يودعه.

كملت ال 35؟ سبت الحياة من غير ما تتجوز وتسيب وراك عبء جديد علي الدنيا. سكتة قلبية؟
صحيح، إمال قلب مين اللي يقف ويرفض الحياة دي.

مش سايب وراك غيرنا. حتي في موتك جميل يا أخي، يا ريتني ما قابلتك

ممكن يعزيني إن إنت بالتأكيد لقيت هناك السلام؟
إن جهنم اللي علي الأرض، اللي اسمها الحياة، ما تستاهلكش؟

وأنا؟

لحد إمتي تخونوني واحد ورا التاني؟
لو الرحيل متقدر، ليه ما نسافرش سوا؟



"غاب القمر يابن عمي، ياللا روحني، دا النسمة آخر الليل بتفوت وتجرحني"

"غاب القمر يابن عمي، ياللا روحني، دا النسمة آخر الليل بتفوت وتجرحني"



سلام...........سلام

سلام

سلام




أيمن حلمي

عنه

سيزيف

9 Comments:

  • At 11:00 PM, Anonymous مختار العزيزي said…

    إنا لله وإنا إليه راجعون. هي حقيقة يومية لكن لا تزال تفاجئنا عندما تقترب من شخص نحبه. الأيام كفيلة بالعلاج. ربنا أرحم به منك بالتأكيد. يرحمه الله ويرحمنا

     
  • At 1:16 AM, Blogger Omar said…

    الله يرحمه ويرحمنا، ويعوضنا عن أمثاله كل خير.. شد حيلك

     
  • At 1:33 AM, Blogger Mr.GEMYHOoOD said…

    سيزيف بالراحة انا حزنت يا اخى من كلامك

    كفايه بقة

     
  • At 4:27 AM, Blogger Mohamed Mehrez said…

    البقاء لله يا سيزيف..إنا لله وإنا إليه راجعون

    أنا لحد دلوقتي مش مصدق اللي حصل إمبارح
    http://mehrez786.blogspot.com/2006/09/blog-post_10.html

     
  • At 5:14 AM, Blogger شــهــروزة said…

    طيب كفاية
    فكرتنى بالغاليين كلهم
    حرام عليك بجد
    البقاء للة وحده

    زى ما بيقولوا
    الموت نقاد...لا يختار الا الجياد
    لان دى فعلا مش دنيتهم

     
  • At 9:15 AM, Blogger بعد الطوفان والجو شبورة said…

    البقاء لله ..

    و دعوات بالرحمة ...


    عاوز أشوفك يا أيمن

     
  • At 4:27 PM, Anonymous Anonymous said…

    اخ يا استاز ايمن
    والله حرااااااااااااااااام
    !!!!!!!!!!!!!!!!!!!!!!!!!!!!!
    ليه هيك يعني الله يباخد الانسان المحترم والكويس
    والفنان الرائع
    والله لسه ما كبر بالعمر
    !!!!!!!!!!!!!!!!!!!!!!!!!!!!!!
    الله يرحمك يا ايمن حامد

     
  • At 4:02 PM, Anonymous Anonymous said…

    i was one of his students & i was resally shocked wn i heared the news, he was really a great artist ....

     
  • At 4:26 PM, Anonymous Anonymous said…

    الف رحمة ونور عليك يا اغلى انسان عندى بالدنيا انا موش عارفة احنا لسه عايشين ازاى بعدك بس دى ارادة الله ولا يمنك ان نعترض عليها وحشتنا اوووووووووووووووووووووووووى يا ايمن مافيش كلام يوصف اللى احنا حاسين بيه بعدك غيابك طاااااااااااااال علينا اوى يا ايمن احنا موش هانتقابل تانى فى الدنيا ولكن الى الملتقىفى الجنة ان شاء الله ويارب تكون من زينة شباب الجنة مروة اختك

     

Post a Comment

<< Home