سيزيف مصري

في الأسطورة الأغريقية، سيزيف في الجحيم وعقابه أن يرفع صخرة من القاع حتي قمة جبل شاهق، وقبل أن يصل بقليل تسقط منه لأسفل، فيعود ليبدأ من جديد، بلا نهاية. ما أشبه ذلك بنا، أولادك يا بلدي

Friday, February 13, 2009

صباح الخير


1

-
صباح الخير
-
يا أخي ليه ما بتقولشي تحية الإسلام؟
2
-
هو لما حد بيخبط علي الباب مش احنا بنقول "مين"؟
-
أيوه
-
هي زيها بالظبط زي التليفون، بنقول "ألو" وهو بقي يرد، يقول "مساء الخير" "سلاموا عليكم"، يقول الي هو عايزه، وبعدين بقي احنا نرد عليه
-

بس في بريطانيا مثلا بيقولو "هاللو" وفي فرنسا "ألو" إيه المانع بقي إننا نقول "سلاموا عليكو" ؟
-

أصل التحية دي ليها معني، معني السلام. المفروض اللي متصل هو اللي يقولها مش اللي بيرد، وعلى فكرة هما لما بيردوا بيقولو
yes و oui
-
ما تفرقشي، إنت اللي مكبر الموضوع ع الفاضي
-
أيوه أيوه. الأحسن ما ترديش خالص
3
-
يا أخي، إذا حييتم بتحية فحيوا بأحسن منها أو ردوها، مش كده؟
-
أيوه، بس أحسن منها من وجهة نظر اللي بيسلم والا اللي بيرد التحية؟
-

وجهة نظر الإسلام
-
حتي لو هما الاتنين مسيحيين مثلا؟
-
إنت بتستعبط، مش كده؟
4
-
يعني من ألف وربعميت سنة وهتيجي دلوقتي تعدل علي الفقهاء
-

يا عم فقهاء إيه، الموضوع بسيط، أنا أوضح لك
-

وضح لي يا عم
-

تفتكر النبي (ص) لما كان بيدخل الأوضة مثلا ويلاقي زوجته السيدة عائشة نايمة في السرير وصحيت، كان بيقول لها إيه؟
-

وإنت إيه الي عرفك؟
-

أكيد مش "السلام عليكم". يعني لا يتفق الحال إنه يقولها "السلام عليكم ورحمة الله وبركاته يا أم المؤمنين"
-

أمال كان بيقول إيه؟
-

ما اعرفشي بالضبط طبعاً، بس أكيد كان بيقول ما معناته "صباح الخير يا جميل"
-

طب استغفر ربنا بقي أحسن تنسخط قرد
5
-
السلام عليكم!!
-

يا عم خضتني.
-
..............
-
إنت أصلا لو تاخد بالك من معني الكلام ده ما تقولهوش بالشكل ده الي بيغير معناه، سلام إيه بقي اللي إنت جاي يتقول عليه

6
-
ما هو لكل مقام مقال
-

يعني إيه؟
-

يعني فيه صباح الخير وصباح القشطة وسعيدة والسلام عليكم وعواف ومساء الخير، فيه تحيات لمناسبات معينة وفيه تحيات لثقافات معينة، يعني في الريف مثلا أو في المناطق الشعبية وللا العشوائية
-

أيواااه. أهو أنا بقي بحب أقول "السلام عليكم" عشان ده تحية الإسلام
-

يعني لما تكون أثناء يومك العادي وقابلت حد أو مجموعة من الناس ما تعرفهمش ممكن تكون "السلام عليكم" أفضل تحية. عشان إنت بتوصل لهم معني إنك مش قاصد شر وبتقولهم السلام. لكن مثلاً لما تكون في البيت أو في الشغل من صبحية ربنا، تقول صباح الخير. بتبقي أنسب، فيه حد يصحي من النوم يقول لأمه ولا مراته السلام عليكم؟ كل اللي بقوله أن فيه بدايل تانية أنسب والمفروض يبقي عندنا اختيارات والموضوع مش روبوت آلي ولا بغبغان
-

طب إيه رأيك إن في مرة واحد في بنزينة مسيحي ما رديش يقولي دورة الميه فين عشان قولت له سلاموا عليكوا؟
-

ماشي، ما هو ده غلط. هو بيصنف وبيمييز في معاملته. صنفك على إنك مسيحي وخد موقف منك عشان إنت قلت كده. وده مش كويس منه طبعاً. الفكرة إن من كتر المسلمين ما بيغييروش التحية دي، بقي الموضوع تصنيف، المسلم يقول كده والمسيحي يقول كده، وده يساعدك ويمووت نفسه عشانك لو قلت له "السلام عليكوا" وده يساعدك ويموت نفسه عشانك لو قلت "مساء الخير"
-

طيب يبقي المفروض أشوفه هو إيه الأول، مسيحي ولا مسلم، وبعدين أقول التحية المناسبة
-

يبقي إنت بترسخ للقرف اللي بيحصل ده, عشان مصلحتك
-

أمال إيه؟
-

لكل مقامٍ مقال
7
صباح الخير


18 Comments:

  • At 10:58 AM, Blogger Hamada said…

    السلام عليكم
    او صباح الخبر
    علشان مفيش حد يزعل بس
    المهم
    سواء السلام عليكم او صباح الخير
    مش هتفرق كتير
    الرسول بلغنا بتحيه الاسلام
    وعلينا اننا نطيعه
    افترض قولنا حاجه غيرها
    اكيد مش هندخل النار
    طيب ايه فايده اننا نقول السلام عليكم
    طيب منقول بيس يا مان وخلاص
    دى حتى اجمد من السلام عليكم
    ايه الفرق بين الى بيقول بيس يا مان وصبح صبح
    والى بيقول السلام عليكم
    كل الحكايه ان ده عاوز يسمع كلام الرسول
    وعاوز يبقى فيه محبه وسلام دائم بين الجميع
    علشان الرسول ابلغنا بضروره افشاء السلام فيما بيننا
    طيب ولو قلت حاجه تانيه
    مش هتدخل النار متخفشى
    بس هيبقى درجتك اقل من الى بيقول سلام عليكم
    طبعا درجتك عند ربنا مش عند حد تانى

    Hamada

     
  • At 1:57 AM, Blogger سيزيف مصري said…

    أهلا يا حمادة

    إنت بتتكلم عن حديث أفشوا السلام بينكم

    إيه رأيك في اللي بيقول "السلام عليكم" بصوت عالي ومفاجئ لدرجة إنه يخضك؟ هل ده بيعمل اللي الرسول كان بيقصده في الحديث؟

    أنا رأيي إنه لو قال أي حاجة تاني يحبها بأسلوب فيه سلام فعلاً هيكون بيعمل اللي الدين بيقول عليه

    فالأمور مش بتتاخد بشكل حرفي وتأويل ظاهري، المعني والمقصود هو الأهم، عشان كده عندنا التفسير والفقه وباقي اللي إنت عارفه
    تحيتي

     
  • At 10:20 AM, Anonymous manir said…

    مساء الفل
    الاخ سيزيف
    انت ليه بتعمم الحكاية؟
    هو معنى ان حد بيقول السلام عليكم بشكل مش عاجبك شخصيا تبقى كلمة السلام بقت كخة؟
    وانت ايه رايك فى اللى بيقول صباح الخير بشكل عالى ومفاجئ وبيخضك برضه؟
    دى طبعا ممكن تكون موجودة فى الاتنين على الرغم انى عمرى ماتخضيت ولا مرة من حد قالى السلام عليكم
    مافيش مانع اننا نقول صباح الخير ودى طبعا ممكن تقول اما انها أذواق أو اتباع للرسول زى ماقال حمادة وزى ماناس كتير بتحب تعمل ويمكن بعد ماقريت موضوعك مرتين لسة برضه مش فاهم ايه اللى مضايقك
    أولا اللى بيرد على التليفون هو اللى بيتكلم الاول وفيه ناس بتحب تبدأ الكلام بكلمة تحية فبيقول السلام عليكم
    ثانيا وجهة نظر الاسلام بتقول لنا قولوا السلام عليكم اما الدين المسيحى أكيد عندهم تحية ولو مافيش يبقوا يقولوا اللى هما عاوزينه ماحدش بيفرض حاجه على حد يعنى برضه دى مش حجة اننا نغير السلام اللى احنا عاوزينه
    يعنى زى مانت شايف ان لو الناس بطلت تقول السلام عليكم مش هايحصل حاجة انا شايف انهم برضه لو استمروا على انهم يقولوها برضه مش هايحصل حاجة وبرضه لو انت استحملتنى ضيف على مدونتك مش هايحصل حاجة

     
  • At 7:34 AM, Blogger سيزيف مصري said…

    dear Manir

    مرحباً بيك في أي وقت

    وتقول الي إنت عايزه

    زي أنا ما قلت برضه

    وأعتقد إننا متفقين في مبدأ حرية اختيار التعبير المناسب لكل واحد، في كل وقت



    صباح الفل

     
  • At 1:37 PM, Blogger Hamada said…

    مبدايا السلام عليكم
    او هيلو
    طبعا هتقولى حد يكتب
    هيلو كده المفروض كده( hello)
    اتعلموها بقى هتفضلوا متخلفين كده لغايه امتى
    او ممكن متقولشى بس يبقى فى نفسك كده تقول ايه ده ناس جاهله صحيح
    او ممكن يبقى عنك ديموقراطيه وحريه وتقول الحكايه عاديه
    يكتب هالو بالعربى بالانجليزى المهم يكتبها.
    لما اقول سلام عليكم
    اقصد كلمه بسيطه جدا فيها معانى كتير
    لاكنها تساوى اى كلمه عاديه من كلمات التحيه فى مجتمعات كثيره
    وان كانت اغلب الدول المتقدمه الان تعمل وفق كلمه السلام عليكم
    ومتهيقلى بيحسدونا علشان احنا بنسلم
    على بعض

    من ناحيه تانيه
    لما اصحى من النوم والاقى حد بيقولى صبااااااااااح الخيييييييير
    تخيل انتا هيحصلى ايه
    نفس كلامك عن كلمه سلام عليكم الى انتا قلت انها ممكن تتقال بصوت عالى
    بس الرسول بتاعنا مكنشى بيقولها بصوت عالى لدرجه انه يخضك يعنى
    المقصود هنا ان المسلمين يكون لهم تحيه واحده يعنى لو انتا ماشى فى امريكا ولقيت واحد فجاه قالك سلام عليكم
    اول حاجه هتعرف انه عربى مسلم
    زى بالظبط لما واحد هندى يقولك شيشتا ووك على راى عمنا كلومبو تعرف علطول انه هندى من تحيته ولهجته
    انا مسلم وبقول السلام عليكم
    ولو قلت غيرها ربنا مش هيدخلنى النار
    لاكن مش معنى كده اننا نعترض على سلام عليكم ولاكن نحاول نخلى الناس كلها تقولها وتعمل بيها
    وهكرر تانى لما تقول السلام عليكم مش هتخسر حاجه
    بس هتكسب انك عملت سنه من سنن الرسول
    وافتكر رسول لاينطق عن الهوى اكيد قالنا افشوا السلام بينكم لسبب
    واعتقد ان كلمه صباح الخير مش تحيه مناسبه فى اغلب الاوقات
    .
    الدول الاكثر تقدما مننا وصلت للتقدم ده لانهم ناس بيفكروا كويس جدا
    دوروا على العلم وتمسكوا بيه
    وجمعوا الاخلاق وعملوا بيها
    خدوا قوانين واخلاق دينا ونفذوها
    والقوانين دى تنفع لاى مكان وزمان
    احنا سبنا العلم وسبنا قوانين دينا وسيبنا الاخلاق او تقريبا وقعت مننا فى الطريق
    اصبح دلوقتى حياتنا فيها نقص روحى كبير
    فعلى الاقل نقول سلام عليكم
    يمكن ربنا الى اسمه السلام ينور لينا طريق فيه هدى وعلم نرجع بيه متقدمين زى الاول
    اعتقد دى ابسط حاجه واول خطوه ممكن نعملها
    مع تحياتى
    Hamada

     
  • At 10:12 AM, Anonymous manir said…

    شوف ياعم
    أولا احنا ممكن نكون متفقين بس ظاهريا بس لان سيادتك مش متفق على الحرية.. اللى انت متفق عليه هو الحرية المقيدة بشروطك انت
    يعنى لما سيادتك تلوم على الناس اللى بتقول السلام عليكم بس باسلوب ظريف شويتين وبدون اسباب مفهومة بس ممكن تكون مجرد موقف شخصى أو احساس ان فيه كلام بيعبر عن وجود فئة معينة احنا حاسين ان وجودها بينغص علينا عيشتنا لاننا مش قابلين وجودهم ولكل واحد اسبابه بس الاصل لا يقبح بقبح بعض اتباعه

     
  • At 2:57 AM, Blogger سيزيف مصري said…

    عم Manir

    كده يبقي إحنا مش متفقين، حتى ظاهريا

    الحرية في الكراهية مكفولة للجميع، زي الحرية في الحب

    لكن فكر إزاي إنك بتدافع عن كلمة "السلام" من غير ما تكون احساس حقيقي مش مجرد كلمة بتقولها

    لو قريت ده في سياق كلامك عن اتفقانا، هتلاقينا مختلفين تماما

     
  • At 12:03 PM, Anonymous manir said…

    انا متفق على الحرية لكن يهمنى كمان الوضوح
    اعذرنى شوية لو التعليق ماعجبكش
    انا لما قريت مواضيعك القديمة لقيتك تقريبا بتبدأ كل شئ باسلوب نقد بسيط ثم الاسلوب التكفيرى أو شديد الاستنكار
    يعنى فيه بعض المواضيع بتنادى بالعلمانية وبتستند لعمر بن الخطاب والرسول لكن فى الاصل انت ولا عاوز الناس تتبع عمر ولا الرسول ومع ذلك بتستند لاحاديثهم وافعالهم فى الحديث عن العلمانية
    ودلوقتى بتستند برضه لحديث أفشوا السلام بينكم وتفسره على انه مش قصده السلام عليكم دا يقصد أى سلام وخلاص مع ان الحكاية واضحة والا كان قال افشوا التحية بينكم

    يظهر اننا فعلا مش متفقين خالص
    احنا مش هاننفع لبعض وخلينا اخوات احسن

     
  • At 2:23 AM, Blogger سيزيف مصري said…

    حلوة حكاية "أسلوب تكفيري" دي

    الإمام على قال ليس بالحق يعرف الرجال، اعرف الباطل تعرف أهله

    وبالنسبة لي لا أحد معصوم، وبالتالي يخضع أي سلوك أو كلام أو موقف لأي أحد (بما فيهم النبي) للتحليل والتأمل والتأويل

    على العموم أنا مقتنع بإن الحوار مش لا زم ينتهي بالاتفاق وإن الحوار الجيد هو اللي بينتهي بإنك تعرف حاجة جديدة عن اللي بتحاوره أو موضوع التحاور أو بأن تحس إنك عاوز تبحث عن حاجة تانية، يعني سؤال

    مرحباً بمرورك في أي وقت

    سيزيف

     
  • At 5:56 AM, Anonymous manir said…

    انت كدة بتتكلم بشكل منطقى اكتر
    يعنى بدال ماكنت بتفسر معنى كلام النبى بشكل معين انا مختلف معاك فيه عشان نقتنع بحاجة معينة بتقول على كلام النبى دلوقتى انه محتاج تاويل يعنى نقتنع بكلامك عنه ولا لأ؟
    عموما انا ماطلبتش ان الحوار ينتهى باتفاق بس على فكرة النبى كان معصوم
    "ما ينطق عن الهوى ان هو الا وحى يوحى"

    شكرا على سعة صدرك

     
  • At 2:28 AM, Blogger hartaka said…

    سيزيف
    تدوينه جميله
    احب اضيف كذا نقطة
    زي منتا قولت
    التحية بتكون حسب الثقافات والبيئة
    وطبيعي ان تحية الاسلام تكون السلام عليكم
    لان الاسلام نزل في بيئة صحراويه
    وسط قبائل متناحرة وعائلات بيغلب عليها الطابع البدوي
    فتخيل كدا لما تشوف حد او جماعة جاي علي عيلة صغيرة عايشه في قبيلة صغيرة وسط صراعات علي الموارد القليلة في الصحراء وعالم سهل فيه ان يتم سبي زوجتك او ابنتك
    طبيعي ان اهم شيء ان يتعرف الاشخاص ان هذا الزائر جاي للسلام فتكون التحية واخدة الشكل دا

    المواقف دي من كتر ما بتحصل معايا كتير
    بقيت تاني يوم اقولة سعيدة
    :)


    ثاني حاجة
    للاخ manir
    كلامك الي بتقول فيه

    بس على فكرة النبى كان معصوم
    "ما ينطق عن الهوى ان هو الا وحى يوحى

    ما ينطق عن الهوي
    هو القرآن
    ان هو
    الضمير عائد مرة اخري علي القران
    إن هو
    اي القران
    وحي يوحي
    الي النبي

    والنبي معصوم في الامور الدينية
    اي التبليغ
    اما الامور الحياتيه فهو بشر

     
  • At 9:39 AM, Anonymous manir said…

    hartaka
    هاللو

    اما ان (هو ) عائدة على القران مش على النبى انت اول واحد يقول الكلام ده واسأل اهل اللغة العربية لو تقدر......
    وخلينا اختلف معاك واوضحلك نقطة والاختلاف كويس حتى ابقى اسأل سيزيف
    احنا مش دايما بنحب ننفذ كلام النبى لاننا عارفين انه صحيح بس احيانا بيبقى تقيل أوى على قلوبنا فافضل حل نفسيا لنا اننا نقول على الكلام غلط وجاى من واحد بيغلط
    ومش معصوم

    خلينا نتكلم فى التحية احسن

    باى باى

     
  • At 7:16 AM, Blogger hartaka said…

    manir
    انا مش اول واحد يقول كدا ولا حاجة
    راجع تفسير الاية ل د نصر حامد ابو زيد في كتابة
    الامام الشافعي وتاسيس الايدولوجية الوسطية
    وهو متخصص في فقة اللغة العربية

    اما بخصوص العصمة هو مش موضوعنا
    بس احب اقولك
    احنا بنقدس كل كبيرة وصغيرة بيعملها الانبياء
    وبنحولها لدين
    وبنخلط ما بين المقدس والعادات والتقاليد والافعال البشرية العادية
    راجع قصة تأبير النخل عنما نهاهم الرسول عنة
    وعندما نفضت وذكروا ذلك له قال لهم انما انا بشر اذا امرتكم بشيء من دينكم فخذوة
    واذا امرتكم بشيء من رايي فانما انا بشر
    رواة مسلم والنسائي

     
  • At 12:42 PM, Anonymous manir said…

    harkata
    فيه موضوع بتاع سيزيف (الموضوع قبل السابق) مسلمين ومسيحيين وكائنات اخرى عن قصة النخل
    ابقى راجع التعليقات الموجودة

     
  • At 7:12 AM, Blogger RamyBoulos said…

    صباح الحب و الخير و الجمال

    أنا كنت حابب أضيف معلومة الحقيقة
    و أعلق على حاجة بعد كدا

    أولاً أنا مش عارف ليه الناس بتربط بين "السلام عليكم" و المسلمين أو تحية الإسلام، علماً بأن الإسلام مفتكسهاش يعني
    في الكتاب المقدس السيد المسيح لما بيدخل على تلاميذه كان بيقولهم السلام عليكم و دا بطبيعة الحال لأنه كان في بيئة يهودية و دي طبيعة المكان

    و بالرجوع للتوراة اللي هي قبل الإنجيل أو القرآن بقرون هنلاقي السلام عليكم. و في اللغة العبرية مستخدمة الكلمة دي بحزافيرها
    -شالوم أليخيم
    -أليخيم شالوم
    يعني السلامو عليكم و عليكم السلام.
    يعني المسيحية كمان مفتكستهاش، بس المسيحيين المتشددين بيتمسكوا بترجمة معينة من الكتاب المقدس بتقول السلام لكم.

    فالإسلام هنا كان بيحيي بتحية هي بالفعل موجودة مش لغى تحية الكفرة و جاب تحية جديدة على متبعيه أن يلتزموا بيها.

    ثانياً التعليق اللي عندي عالموضوع دا، أن المهم هو روح الكلمة مش أن الكلمة تفرغ من معناها، لو شايف أن السلام عليكم هيَّ أكتر حاجة بتعبر عن مشاعرك اللي بتقولها للي قدامك قولها، لكن أنا ممكن أقول صباح الخير أو سعيدة أو العواف و هيَّ بتحمل سلام و حب أجمل بكتير من ما أقول السلامو عليكو من غير ما تكون بتحمل السلام الحقيقي و المشاعر الطيبة.
    فأنا مع أني أفشي السلام لكن مش مع فرض لأسلوب معين يبرمج لساني لإفشاء السلام، لأن كل مجتمع ثقافته بتختلف عن التاني.
    يعني إحنا في بلدنا في ناس كتير بسطا و بتحيي الصباح بجمل جميلة و رقيقة، الواحد لما بيقعد يتفرج عالأفلام القديمة أو يقعد مع حد من القدام دول بيفتقدها جداً الحقيقة، زي نهارك سعيد و صباحك سكر زيادة و نهارو أبيض. كلام كله بيتقال بوجه بشوش و طيبة يخلوا اليوم يبقالهم شكل و لون تاني فعلاً.
    لكن الكلام المفرغ من معناه اللي لا له لون ولا طعم ولا ريحة بوش متجهم و شكل مقزز بيرجع للجاهلية زي ما بيسموها و يدخل عليك يقولك السلامو عليكو أو الناس تقولها و هي مش باصة في وش بعض أصلاً ولا ملتفتة لبعض... يا فرحتي
    ثم الأخ اللي عاوز يجيب اللي بيقول صباح الخير للي هيقول السلامو عليكو فأنا شايف الحقيقة أن معاك حق لكن الفرق كبير لأن دا بيأدي السلام على أنه فرض مفروض عليه و لازم يقول الكلمتين عشان ميشيلش الذنب لكن دا مش مجبر أنه يقول صباح الخير لأن مش في باله ثواب ولا عقاب لكن بيقول إصتباحته بفعل الحب، طبعاً مش بأجمع ولا بأقول الكل لكن أنا بأقول الأغلب.

     
  • At 4:52 AM, Blogger novamending said…

    aloha

     
  • At 12:52 AM, Blogger Kontiki said…

    صباح الخير
    قرات التدوينة اثناء البحث العشوائى فى مشاعر المدونين و كتابتهم ومواقفهم و عندما يستوقفنى موضوع احب ان اعلق
    للاسف يا سيدى اصبحنا مغرقين فى الشكليات التافهه وانا كمسلمة اصبحت اشعر انننى موصومة من كثرة العادات السيئة التى البسهاالبعض ثوب الاسلام وبكل اسف هذا البعض من المسلمين اصبح نسبة كبيرة جدا فى المجتمع المصرى فقد تجد من يجادلك ويجادلك ويحاول يقنعك انه لا سلام على مسيحى ولا نبادرة بالسلام ايا كان شكل هذه التحية !! اليس هذا اشعال لبذور الضغائن و الفتن ؟ اليس هذا ضد الفطرة المحبة للاستقرار و السلام الفطرة التى تحترم الانسان لذاتة بعيدا عن دينة ولونة . اصبحت تجدمن يجادلك و يجادلك ويحاول يقنعك انه اذا مات اخ مسيحى لا يصح ان نقول مثلا رحمة الله علية !! الم تسع رحمة الله كل شىء ؟؟ لماذا اصبح كثير من المسلمين عنصريين ومتوقعين انهم فقط على حق و الباقى على باطل لما نظن ان رحمة الله حكرا علينا فقط كمسلمين ! لماذا يظن البعض ان مقايسنا الدنيوية التافهه والعنصرية هى ما سيطبقة الله فى السماء ! لماذا نظن ان تفسيرنا لايات القران الكريم هو الصواب بعينة ولماذا ندفع انفسنا دفعا الى العنصرية ! لا ادرى و الله
    انا وغيرى من اصحاب العقول المتفتحة على الاخر التى تقبلة كما هو انسان قبل اى شىء بغض النظر عن عبادتة وعن الهه اصبحنا مسلمين ولكن بدرجة منبوذين. غرق مجتمعنا فى الشكليات و التفاهات
    اصبح معيار الشرف و الاخلاق للبنت المسلمة هو الحجاب والمسلمة غير المحجبة تتهم بالفجور.
    اصبحنا نتحاور ونتجادل و تشغلنا قضية اى سلام نقول اى تحية افضل
    اليس قبل كل شىء التحية باى لفظ كان او باى عبارة انما تعبر عن الود والاحترام تجاة الشخص او الاشخاص الموجهه اليهم !!
    اليست طريقة لبقة لكسر حواجز الجليد بين الاشخاص وللتعارف لماذا نصر اذن ان نلبسها ثوب عنصريا ؟ لما نصر ان نقييمها اهى ترضى الله ام لا ؟ اليس المبدأ الالهى لمرضاة الله هو حسن الخلق فى معاملة عبادة هل يرضى الله عن انسان مسلم اسلاما شكليا وقلبة ملىء بالامراض ؟
    تحيتى لصاحب المدونة
    والله يا اخى اذا كنت انت تعانى فنحن ايضا نعانى ونحتاج الى صحوة كبرى فى المجتمع ولكن للاسف لا توجد بارقة امل حتى الان
    وعذرا على طول التعليق

     
  • At 1:25 AM, Blogger سيزيف مصري said…

    أشكرك. ومرحبًا بكي دائمًا
    وجود مثلك ممن يفهم معني أن تعامل الآخر بوصفه إنساناً هو الذي يجعلنا نواصل ما نبذله من محاولات، تنتهي اسفل التل

    تحيتي

     

Post a Comment

<< Home