عروض المهرجان القومي للمسرح المصري

بدأت أمس الاثنين 10/7 أولي فعاليات المهرجان القومي للمسرح المصري، ولأول مرة. وسيستمر حتي يوم الأربعاء الموافق 19/7 وسيكون علي كل مسارح القاهرة (تقريبا) والعروض مفتوحة للجمهور

موقع صندوق التنمية الثقافية (مشكورا، رغم إنه الجهة المنظمة) وضع جدول العروض علي موقعه

http://194.79.103.179/national_theater/sch.asp

العروض في مسارح مختلفة في القاهرة، وأي حد يحب يروح وعنده مشكلة في عنوان مسرح منهم ممكن يسألني وهأحاول أساعده – بالايميل. أرجو بس إن ما حدش يستغل الفرصة دي علشان يتعرّف عليا ولا حاجة – خاصة الولاد. أما البنات فممكن تستغل الفرصة دي لو عاوزة

كلمة المهرجان

احنا طبعا بنرحب بأي مهرجان مسرح لأنه معناه عروض زيادة وانتشار أكتر وجوايز ساعات بتروح لفنانين مستقلين فتدعمهم وتديهم جزء من حقهم ومعناه برضة فرصة في "العرض" اللي في حد ذاته بالنسبة ليهم بيبقي شيء يلزم لأجله بذل المال والجهد وكل ما يبذل، لعدم فتح مسارح الدولة لأبوابها لهم - باستثناء الهناجر

الجديد في المهرجان ده إن فيه كل اتجاهات المسرح في مصر: المسرح الخاص (زي مسرح سمير غانم دو ري مي فاصوليا) و مسرح الدولة (البيت الفني للمسرح زي الملك هو الملك وأهلا يا بكوات) والمسرح المستقل (اللي موجود علي استحياء، عرضين بس: عرضحال والبطة البرية) ومسرح الجامعة (زي عرض آداب جامعة المنيا وجامعة المنصورة) وفرق الهيئة العامة لقصور الثقافة (زي عرض بيت الدمية من الإسكندرية)

وتحديدا فتح الدولة أبوابها للفرق الحرة والمستقلة للدخول في المنافسة (قدام عروض ميزانيتها بالآلاف) رغم إن ممكن مثلا نلاحظ إن عروضهم ممكن تلاقيها في مسرح أقل "شوية" من ناحية الإمكانيات من غيرهم، بنعتبرها مجرد صدفة طبعا – إلا لو أتكررت

الوقت ده تحديدا له دلالته لإقامة مثل هذا المهرجان، في وقت الدولة فيه بتلم (نفسها، الدور، بتوع المسرح اللي بره الحظيرة)ه

علي كل حال، اختيار التعاون مع الدولة وأخذ ما يمكن منها – دون تنازلات أو بتنازلات محسوبة – ممكن أن يتفهمه المرء، مثل تفهمه لهؤلاء المقاطعون

يشارك بالمهرجان القومي للمسرح المصري 38 عرضاً لـ 32 فريق حيث يشارك البيت الفني للمسرح بـ 9 عروض ومركز الإبداع الفني بـ 3 عروض ومركز الهناجر للفنون بـ 3 عروض والبيت الفني للفنون الشعبية بعرض واحد والهيئة العامة لقصور الثقافة بـ 5 عروض والجمعية المصرية لهواة المسرح بعرضين و جمعية دراسات وتدريب الفرق المسرحية الحرة بعرضين وتشارك الجامعات بـ 4 عروض والاتحاد العام للشركات بعرضين والمسرح الخاص بـ 3 عروض وعرضان لكل من الفرقة المستقلة و المعهد العالى للفنون المسرحية و على هامش المهرجان يشارك عرضان

عن الفرق المشاركة

http://194.79.103.179/national_theater/group.asp